बेइजिङ । चिनियाँ प्रविधि क्षेत्रको दिग्गज कम्पनी अलिबाबा ग्रुपले व्यावसायिक संस्थाहरूलाई लक्षित गर्दै नयाँ आर्टिफिसियल इन्टेलिजेन्स (एआई) प्लेटफर्म ‘वुकोङ’ सार्वजनिक गरेको छ। चीनमा पछिल्लो समय बढ्दै गएको ‘ओपनक्ल’ को लहर र एआई एजेन्ट बजारको प्रतिस्पर्धालाई मध्यनजर गर्दै अलिबाबाले मंगलबार यो नयाँ प्रविधि ल्याएको हो।वुकोङ प्लेटफर्मले जटिल व्यावसायिक कार्यहरूलाई स्वचालित बनाउन मद्दत गर्नेछ। यसले एउटै इन्टरफेसबाट कागजात सम्पादन गर्ने, स्प्रेडसिट अपडेट गर्ने, बैठकका कुराकानीलाई अक्षरमा उतार्ने र विभिन्न अनुसन्धानका कामहरू समन्वय गर्न सक्छ। हाल यो प्लेटफर्म निश्चित प्रयोगकर्ताहरूका लागि मात्र बेटा टेस्टिङको रूपमा उपलब्ध गराइएको छ।
अलिबाबाले आफ्नो संगठनात्मक संरचनामा परिवर्तन गरी नयाँ अलिबाबा टोकन हब (एटीएच) स्थापना गरेलगत्तै यो फ्ल्यागसिप उत्पादन सार्वजनिक गरेको हो। यसले कम्पनी अब पूर्ण रूपमा इन्टरप्राइज एआई एजेन्टको क्षेत्रमा केन्द्रित हुन लागेको सङ्केत गर्छ। प्रयोगकर्ताहरूले वुकोङलाई छुट्टै डेस्कटप एप्लिकेसनका रूपमा वा अलिबाबाको व्यावसायिक सञ्चार प्लेटफर्म ‘डिङटक’ मार्फत प्रयोग गर्न सक्नेछन्। डिङटकमा हाल २ करोडभन्दा बढी कर्पोरेट प्रयोगकर्ताहरू आबद्ध छन्।
कम्पनीका अनुसार यो प्लेटफर्मले स्ल्याक, माइक्रोसफ्ट टिम्स र वीच्याट जस्ता अन्य प्रसिद्ध मेसेजिङ सेवाहरूसँग पनि समन्वय गर्नेछ। चीनमा हालैका हप्ताहरूमा ओपनक्लजस्ता ओपन-सोर्स एआई एजेन्ट उपकरणहरूको माग ह्वात्तै बढेपछि अलिबाबाले आफ्नो उपस्थितिलाई बलियो बनाउन यो कदम चालेको हो।अलिबाबा मात्र नभई चीनका अन्य प्रविधि कम्पनीहरू बाइट डान्स, टेन्सेन्ट र एआई स्टार्टअप झिपुले पनि यस्तै प्रकारका एआई सेवाहरू ल्याइरहेका छन्।
