काठमाडौं । नेपालको प्रतिष्ठित इलेक्ट्रोनिक्स ब्रान्ड सीजीले आफ्नो प्रिमियम श्रेणी सीजी मेरिडिया अन्तर्गत अत्याधुनिक ड्रिप कफी मेकर बजारमा ल्याएको छ ।
यसअघि सार्वजनिक गरिएको एस्प्रेसो मेकरको सफलतापछि कम्पनीले नेपालमा बढ्दो कफी संस्कृति र चिसो मौसमलाई मध्यनजर गर्दै यो नयाँ उपकरण सार्वजनिक गरेको हो ।
घर वा कार्यालयमै क्याफे जस्तै फ्रेस ब्रुअड कफीको स्वाद लिन चाहने उपभोक्ताहरूका लागि यो मेसिन उत्कृष्ट विकल्प हुने कम्पनीले विश्वास लिएको छ । विशेष गरी ठूला परिवार र कर्पोरेट कार्यालयहरूलाई लक्षित गरी ल्याइएको यस ड्रिप कफी मेकरमा १.२५ लिटर क्षमताको ग्लास क्याराफे (सिसाको जग) रहेको छ । ७५० वाटको शक्तिशाली पर्फर्मेन्स क्षमता भएको यो मेसिनले निकै कम समयमा कफी तयार पार्छ ।
यसमा कफी बनेको ४० मिनेट पछिसम्म पनि तातो र ताजा राखिरहन विशेष वर्मिङ प्लेट जडान गरिएको छ । साथै, कफी चुहिनबाट रोक्न एन्टी–ड्रिप स्टप मेकानिजम र सुरक्षाका लागि अटो–सट अफ तथा बोइल ड्राई प्रोटेक्सन जस्ता स्मार्ट सुविधाहरू समेत समावेश छन् ।
आकर्षक ब्ल्याक र सिल्भर प्रिमियम फिनिसिङमा उपलब्ध यो कफी मेकर देशभरका २८ वटा सीजी डिजिटल शोरुम, आधिकारिक बिक्रेता र अनलाइन पोर्टल मार्फत खरिद गर्न सकिन्छ ।
सीजीले ४० भन्दा बढी सेवा केन्द्रहरू मार्फत बिक्रीपछिको भरपर्दो प्राविधिक सहयोगको सुनिश्चितता समेत गरेको छ । नेपालमा कफी पिउने संस्कार जीवनशैलीकै रूपमा विकास भइरहेको अवस्थामा यसले उपभोक्ताको भान्सालाई अझ स्मार्ट र आधुनिक बनाउने कम्पनीको दाबी छ ।
