काठमाडौं। नबिल बैंक लिमिटेडको ४२औँ वार्षिक साधारणसभाले आर्थिक वर्ष २०८२/८३ को मुनाफाबाट शेयरधनीहरूका लागि प्रस्ताव गरिएको १५.८० प्रतिशत लाभांश (पाँच प्रतिशत बोनस शेयर र १०.८० प्रतिशत नगद लाभांश) सर्वसम्मतिले पारित गरेको छ।

बैंकका अध्यक्ष निर्वाणकुमार चौधरीको अध्यक्षतामा बिहीबार काठमाडौँको भद्रकालीस्थित त्रिभुवन आर्मी अफिसर्स क्लबमा साधारणसभा सम्पन्न भएको हो।

सभाले साधारण शेयरधनीका लागि उक्त लाभांश पारित गर्नुका साथै अविमोच्य असञ्चिति अग्राधिकार शेयरधनीका लागि आठ प्रतिशत लाभांशसमेत स्वीकृत गरेको छ। साधारणसभाको उद्घाटन समारोहमा पहिलो पटक मौलिक संस्कृतिको प्रवर्धन झल्काउने विशेष प्रस्तुतिसमेत राखिएको थियो।

वित्तीय विवरण र प्रगतिको खाका

समीक्षा वर्षमा प्रस्तावित बोनस शेयर वितरणपश्चात बैंकको चुक्ता पुँजी रु. ३३ अर्ब ४० करोड नाघेको छ। आर्थिक वर्ष २०८२/८३ मा बैंकले रु. ७ अर्ब ९१ करोड खुद मुनाफा आर्जन गर्न सफल भएको छ।

बैंकको हालसम्मको वित्तीय स्थिति उत्साहजनक देखिएको छ:

• निक्षेप संकलन: १३.०६ प्रतिशतले बढेर रु. ६ खर्ब २ अर्ब ९३ करोड पुगेको (रु. ६९ अर्ब ६७ करोड वृद्धि)।

• कर्जा तथा सापटी: १२.१५ प्रतिशतले बढेर रु. ४ खर्ब ७६ अर्ब ८७ करोड पुगेको (रु. ५१ अर्ब ६८ करोड वृद्धि)।

• वासलातको आकार: १५.३८ प्रतिशतले वृद्धि भई रु. ७ खर्ब ३४ अर्ब ७६ करोड पुगेको।

भविष्यको रणनीति र सञ्चालक समिति चयन

सभालाई सम्बोधन गर्दै अध्यक्ष निर्वाणकुमार चौधरीले संस्थागत सुशासन, ग्राहक सन्तुष्टि र आधुनिकीकरणलाई बैंकले सधैं उच्च प्राथमिकतामा राखेको बताए। बैंक स्थापना हुँदाको सुरुवाती चुक्ता पुँजीको तुलनामा हाल पुँजी ९६० गुणाले वृद्धि भएको उनले जानकारी दिए।

साधारणसभाले संस्थापक शेयरधनीतर्फबाट निर्वाणकुमार चौधरी, मलय मुखर्जी र सइद मन्सुर मुस्तफालाई सञ्चालक समितिमा निर्विरोध निर्वाचित गरेको छ।

चार दशकभन्दा लामो समयदेखि गुणस्तरीय बैंकिङ सेवा दिँदै आएको नबिल बैंकले हाल देशभर २६२ शाखा र ३१६ वटा एटिएममार्फत २८ लाखभन्दा बढी ग्राहकलाई सेवा दिइरहेको छ। दिगो बैंकिङको अवधारणालाई आत्मसात् गरेको बैंकले डिजिटल माध्यम (एनबैंक) लाई तीव्रता दिएको छ भने सन् २०३० सम्म ‘एआई रेडी बैंक’ बन्ने महत्त्वाकांक्षी लक्ष्य लिएको छ। साथै, बैंकले आफ्नो भिजनतर्फ ट्रष्ट, ट्रान्सपरेन्सी, ट्यालेन्ट, टेक्नोलोजी र ट्रान्सफरमेसन (पाँच ‘टि’) को अवधारणालाई अघि बढाएको छ।