काठमाडौं। अधिकांश नेपालीका लागि दशैँ भनेको पुस्तौँदेखि चलिआएको परम्परा धान्दै घर फर्कने र परिवारसँग भेटघाट गर्ने विशेष समय हो। तर, दशैँमा घर फर्किंदा टिकट पाउन धेरैका लागि चुनौतीपूर्ण हुने गर्दछ।
यही समस्यालाई सम्बोधन गर्दै कोका-कोलाले ‘भरौँ खुसी’ दशैँ अभियान २०२६ सञ्चालनमा ल्याएको छ, जसको मुख्य उद्देश्य घर फर्किने यात्रालाई सहज बनाउँदै चाडपर्वको खुसी थप्नु रहेको छ।
अभियान सुरु भएदेखि नै सयौँ सहभागीहरूले हवाई (फ्लाइट) र बस टिकटका भौचर जितिसकेका छन्। भदौ १८ देखि कात्तिक २९ गते (सेप्टेम्बर ३ देखि नोभेम्बर १५, २०२६) सम्म चल्ने यस योजनामा अझै धेरैलाई सहभागी भई टिकट जित्ने अवसर बाँकी छ।
यसका लागि सहभागीहरूले दशैँ विशेष २.२५ लिटर र १.५ लिटरका कोक, स्प्राइट तथा फ्यान्टाका पेट बोटलमा रहेको क्युआर (QR) कोड स्क्यान गरी वेबसाइटमार्फत रजिस्टर गर्नुपर्नेछ।
कोका-कोला बोटलर्स नेपालका प्रबन्ध निर्देशक तथा प्रमुख कार्यकारी अधिकृत अजय कोनाले नेपालीहरूका लागि दशैँमा घर फर्कनु र परिवारसँग समय बिताउनुको महत्त्व बुझेरै भेटघाटहरूलाई सहज बनाउन ‘भरौँ खुसी’ अभियान ल्याइएको बताउनुभयो।
यस अभियानअन्तर्गत कोका-कोलाका ब्रान्ड एम्बेसेडरद्वय प्रदीप खड्का र स्वस्तिमा खड्का फिचर भएको विशेष टेलिभिजन विज्ञापन पनि प्रसारण भइरहेको छ।
उक्त विज्ञापनमा दशैँमा घर फर्कँदाका व्यग्र प्रतीक्षाका पलहरू र परिवारसँगका आत्मीय क्षणहरूलाई भावनात्मक रूपमा प्रस्तुत गरिएको छ। विशेष गरी अध्ययन, रोजगार वा अन्य कामले गृहजिल्ला बाहिर रहेका नागरिकलाई लक्षित गर्दै यस अभियानले चाडपर्वमा प्रियजनहरूसँगको सामीप्यतालाई थप जोड दिएको छ।
