काठमाडौँ । प्रविधि कम्पनी एनभिडियाले पहिलो पटक अमेरिकामा आफ्नो कृत्रिम बुद्धिमत्ता (एआई) सुपर कम्प्युटर निर्माण गर्ने घोषणा गरेको छ ।

एनभिडियाले आफ्नो प्रमुख एआई चिप ब्ल्याकवेल उत्पादन र परीक्षण गर्न एरिजोना र टेक्सासमा १० लाख वर्ग फिटभन्दा बढी क्षेत्रफलमा फैलिएको पूर्वाधार निर्माण गर्ने पनि घोषणा गरेको छ । यस प्रविधि महाशक्तिले आगामी चार वर्षमा लगभग आधा ट्रिलियन डलर बराबरको प्रविधि पूर्वाधार निर्माण गर्ने बताएको छ । एनभिडियाका संस्थापक जेन्सेन हुआङले पहिलो पटक विश्वको एआई प्रविधिको इन्जिन अमेरिकामा विकास भइरहेको बताए । उनले भने- अमेरिकामा भइरहेको उत्पादनले हामीलाई एआई चिप्स र सुपर कम्प्युटरहरूको अत्यधिक र बढ्दो मागलाई राम्रोसँग पूरा गर्न मद्दत गर्नेछ । हाम्रो आपूर्ति शृङ्खला बलियो हुनेछ र संकटसँग जुध्ने हाम्रो क्षमता पनि बढ्नेछ ।'

एनभिडियाको यो घोषणा यस्तो समयमा आएको हो जब ट्रम्प प्रशासनले स्मार्टफोन र ल्यापटप जस्ता इलेक्ट्रोनिक उपकरणहरूमा दिइएको ट्यारिफ छुट केवल अस्थायी राहत भएको बताएको थियो । यो छुट अधिकारीहरूले अर्धचालक उद्योगको लागि नयाँ ट्यारिफ प्रणाली तयार नगरेसम्मका लागि हो । राष्ट्रपति डोनाल्ड ट्रम्प र ह्वाइट हाउसका अधिकारीहरूले कर छूट त्यति ठूलो नभएको बताएका छन् । यो छुटले इलेक्ट्रोनिक उपकरण र अन्य आवश्यक पार्टपुर्जामा अमेरिकी भन्सारको प्रभावलाई थोरै कम गर्नेछ, तर यसलाई पूर्ण रूपमा हटाउने छैन ।

यी उत्पादनहरूलाई पारस्परिक शुल्कबाट छुट दिइएको छ, तर अझै पनि अर्धचालक करमा समावेश गरिएको छ, जुन सम्भवतः अर्को एक वा दुई महिनामा लागू हुन सक्ने अमेरिकी वाणिज्य सचिव हावर्ड लुटनिकले बताएका छन् ।