काठमाडौँ – परराष्ट्रमन्त्री शिशिर खनाल र नेपालका लागि चिनियाँ राजदूत चाङ माओमिङबीच शिष्टाचार भेटवार्ता भएको छ। नेपालस्थित चिनियाँ राजदूतावासका अनुसार मन्त्री खनाल र राजदूतबीच मङ्गलबार परराष्ट्र मन्त्रालयमा भेटवार्ता भएको हो।
भेटका क्रममा नेपाल र चीनबीचको द्विपक्षीय सम्बन्ध, आपसी हित र व्यावहारिक सहयोगका विषयमा फलदायी छलफल भएको दूतावासले जनाएको छ। दुवै पक्षबीच आपसी सहयोगलाई थप सुदृढ बनाउँदै विभिन्न क्षेत्रमा द्विपक्षीय सहकार्यलाई तीव्रता दिने सहमति भएको छ।
“हामीबीच नेपाल–चीन सम्बन्ध र व्यावहारिक सहयोगका विषयमा विचार आदानप्रदान भयो,” चिनियाँ दूतावासले सामाजिक सञ्जाल फेसबुकमार्फत भनेको छ, “आपसी सहयोगलाई मजबुत बनाउँदै द्विपक्षीय सहकार्यलाई तीव्रता दिने र दुई देशबीचको सम्बन्धलाई नयाँ उचाइमा पुर्याउने विषयमा हामी सहमत भएका छौँ।”
