काठमाडौं । सिद्धबाबा सुरुङमार्ग आयोजनाको निर्माण कार्य ६८ प्रतिशत पूरा भएको छ । वर्षौंदेखि पहिरो र चट्टान खस्ने जोखिमका कारण त्रासपूर्ण यात्रा बन्ने गरेको सिद्धबाबा क्षेत्रमा अब सुरक्षित आवागमनको आशा बढेको छ ।
सिद्धार्थ राजमार्ग अन्तर्गत निर्माण भइरहेको यो सुरुङमार्गबाट आगामी असोजदेखि सवारी सञ्चालन गर्ने लक्ष्यसहित काम भइरहेको आयोजनाले जनाएको छ । राष्ट्रिय गौरवको आयोजनाका रूपमा अघि बढाइएको परियोजनाको वित्तीय प्रगति हालसम्म ५८ प्रतिशत पुगेको आयोजना प्रमुख राजेश पौडेलले जानकारी दिए ।
पाँच वर्षे निर्माण अवधि रहेको आयोजना इन्जिनियरिङ, प्रोक्युरमेन्ट एन्ड कन्स्ट्रक्सन (इपिसी) मोडलमा निर्माण भइरहेको छ। यस मोडलअन्तर्गत डिजाइनदेखि निर्माणसम्मको सम्पूर्ण जिम्मेवारी निर्माण कम्पनीलाई दिइएको छ ।
आयोजनाका अनुसार सुरुङ सञ्चालनमा आएपछि पाँच वर्षसम्म निर्माण कम्पनीले नै सञ्चालन, मर्मतसम्भार तथा सुरक्षाको जिम्मेवारी सम्हाल्नेछ । त्यसपछि थप पाँच वर्ष ‘ल्याटेन्ट डिफेक्ट लायबिलिटी पिरियड’ (डिएलपी) लागू हुनेछ ।
सिद्धबाबा क्षेत्रमा हरेक वर्ष वर्षायाममा पहिरो खस्ने, सडक अवरुद्ध हुने तथा मानवीय क्षति हुने समस्या दोहोरिँदै आएको छ । यही जोखिम न्यूनीकरणलाई प्राथमिकतामा राख्दै सुरुङमार्ग निर्माण अघि बढाइएको आयोजनाले जनाएको छ । आयोजनाका अनुसार परियोजनाको मुख्य उद्देश्य दूरी घटाउनु भन्दा पनि यात्रुलाई सुरक्षित यात्रा सुनिश्चित गर्नु हो ।
प्रारम्भिक चरणमा भने कानुनी तथा प्राविधिक जटिलताका कारण निर्माण प्रभावित भएको थियो । नेपालमा पहिलो पटक प्रयोग गरिएको इपिसी मोडलका कारण कागजी प्रक्रिया जटिल बनेको थियो भने रुख कटान अनुमति, बजेट व्यवस्थापनलगायत विषयमा ढिलाइ हुँदा कामले अपेक्षित गति लिन सकेको थिएन । अहिले ती अधिकांश समस्या समाधानउन्मुख रहेको आयोजनाको भनाइ छ ।
सुरुङसँगै सडक र बाहिरी संरचना निर्माणको काम पनि भइरहेको छ । सुरुङ सञ्चालनपछि जोखिमयुक्त भिर क्षेत्रमा संरक्षण संरचना निर्माण गरिनेछ भने पैदल यात्रुका लागि सुरक्षित मार्ग र खानेपानी व्यवस्थापनको योजना पनि समावेश गरिएको छ ।
सुरुआती अनुमानमा करिब १० अर्ब रुपैयाँ लागत लाग्ने भनिएको आयोजना प्रतिस्पर्धात्मक ठेक्का प्रक्रियामार्फत करिब ७ अर्ब रुपैयाँमा सम्झौता गरिएको थियो । आयोजना सम्पन्न भएपछि बुटवल–पाल्पा सडकखण्डको यात्रा थप सुरक्षित, सहज र भरपर्दो बन्ने अपेक्षा गरिएको छ ।
