काठमाडौँ। नेपाल विद्युत् प्राधिकरणले चालु आर्थिक वर्ष २०८१।८२ को ६ महिनामा ११ अर्ब ३६ करोड रुपैयाँ नाफा कमाएको छ । प्राधिकरणले साउन देखि पुसमसान्तसम्म विद्युत् बिक्री, ब्याज तथा अन्यबाट कुल ७० अर्ब ४४ करोड रुपैयाँ आम्दानी गरेको हो ।
विद्युत् खरिद, प्रशासनिक र विभिन्न आयोजना लगायतमा ५९ अर्ब ८ करोड रुपैयाँ खर्च गरेको प्राधिकरणले जनाएको छ । यस आधारमा अप्रशोधित नाफा (करकट्टी गर्नुअघि) ११ अर्ब ३५ करोड ९२ लाख हुने अनुमान रहेको विद्युत् प्राधिकरणको भनाइ छ । जुन गत आर्थिक वर्षको ६ महिनाको तुलनामा भने घटि हो । गत आर्थिक वर्षको साउनदेखि पुसमसान्तसम्म अप्रशोधित नाफा (करकट्टी गर्नु अघि) १५ अर्ब ३६ करोड ६ लाख हुने विद्युत् प्राधिकरणको अनुमान थियो । विद्युत् बिक्री, ब्याज तथा अन्यबाट कुल ६७ अर्ब २८ करोड ७७ लाख रुपैयाँ आम्दानी गरेको थियो । प्राधिकरणले विद्युत् खरिद, प्रशासनिक र विभिन्न आयोजना लगायतमा ५१ अर्ब ९२ करोड ७१ लाख खर्च गरेको थियो ।
आर्थिक वर्ष २०७२।७३ मा ८ अर्ब ८९ करोड वार्षिक घाटामा रहेको प्राधिकरण त्यसपछिका वर्षमा निरन्तर नाफामा रहेको तथ्यांकले देखाउँछ । आर्थिक वर्ष २०८०।८१ मा विद्युत् प्राधिकरणले १४ अर्ब ४६ करोड रुपैयाँ नाफा कमाएको थियो । नाफाबाट विद्युत् प्राधिकरणले विद्युत् उत्पादन, प्रसारण र वितरणतर्फका पूर्वाधार विस्तार एवं सुदृढीकरण र विद्युतीकरणतर्फका आयोजनामा लगानी गरिरहेको छ ।
