काठमाडौँ । अमेजनले विश्वभरका करिब २२ करोड प्राइम सदस्यहरूलाई ईमेलमार्फत् अमेजनको नाममा भइरहेका ठगी (इम्पर्सोनेशन) आक्रमणहरू बढेको भन्दै सजग रहन आग्रह गरेको छ । कम्पनीले ग्राहकहरूलाई शंकास्पद इमेल, फोन कल र लिंकप्रति सतर्क रहन आग्रह गरेको हो ।अमेजनले पठाएको इमेलमा प्राइम सदस्यता नवीकरण वा “सब्सक्रिप्सन शुल्क बढ्दैछ” भन्ने दाबीसहितको नक्कली इमेल पठाई प्रयोगकर्तालाई ‘cancel subscription’ बटन थिच्न लगाइ खाता प्रमाणीकरण विवरण चोरी गर्ने काम बढिरहेको छ । इमेलहरूमा अन्य स्रोतबाट जुटाइएको व्यक्तिगत विवरण समावेश गरी विश्वसनीय देखाउने प्रवृत्ति देखिएको अमेजनले जनाएको छ ।
फोर्ब्समा प्रकाशित समाचारका अनुसार साइबर सुरक्षा अनुसन्धानकर्ता पिटर आर्न्ट्जले १६ जुलाई एक पत्र मार्फत अमेजन प्राइम सम्बन्धी स्क्यामहरू तीव्र बनेको बताएका थिए । उनले सब्स्क्रिप्सनको नाममा हुने ठगी र सामाजिक इन्जिनियरिङ फोन कल दुवै उच्च दरमा चलिरहेको चेतावनी दिएका छन् ।
