काठमाडौं। अन्तर्राष्ट्रिय मुद्रा कोष (आईएमएफ) को एक टोलीले नेपालको सुशासन, भ्रष्टाचार जोखिम र आर्थिक संरचनासम्बन्धी अध्ययन (गभर्नेन्स एन्ड करप्सन डायग्नोस्टिक–जीसीडी) सम्पन्न गरेको छ ।
नेपाल सरकारको अनुरोधमा आईएमएफको क्षमता विकास टोलीका प्रमुख जोनाथन पाम्पोलिनाको नेतृत्वमा टोलीले अप्रिल २० देखि मे ६ सम्म काठमाडौं र वीरगञ्जमा अध्ययन तथा छलफल गरेको हो ।
यो अध्ययनले नेपालका आर्थिक नीतिगत संरचना, सार्वजनिक वित्त व्यवस्थापन, कर–भन्सार प्रशासन, वित्तीय क्षेत्रको नियमन, सार्वजनिक खरिद प्रणाली तथा राज्यस्वामित्वका संस्थाहरूमा रहेका सुशासन र भ्रष्टाचार जोखिमको विश्लेषण गरेको आईएमएफले जनाएको छ ।
यसअघि जनवरीमा गरिएको प्रारम्भिक अध्ययनपछि विस्तृत रूपमा गरिएको यो दोस्रो चरणको कामले नेपालमा आर्थिक स्थिरता, लगानी वातावरण र दिगो विकासमा बाधा पुर्याउने नीतिगत कमजोरी पहिचान गर्ने उद्देश्य राखेको थियो ।
आईएमएफका अनुसार अध्ययनका क्रममा सरकारी निकाय, नियामक संस्था, निजी क्षेत्र, नागरिक समाज, विज्ञ समूह तथा विकास साझेदारहरूसँग विस्तृत छलफल गरिएको थियो।
टोलीले नेपालमा भ्रष्टाचार नियन्त्रण, पारदर्शिता अभिवृद्धि र सार्वजनिक संस्थाप्रति जनविश्वास बढाउन आवश्यक सुधारका क्षेत्र पहिचान गरेको जनाएको छ ।
आईएमएफले तयार पार्ने प्रारम्भिक प्रतिवेदन आगामी महिनाहरूमा नेपाल सरकारलाई सुझावका लागि पठाइनेछ भने अन्तिम प्रतिवेदन सरकारको सहमतिपछि सार्वजनिक गरिनेछ ।
