काठमाडौं। बैंकिङ प्रणालीमा रहेको अधिक तरलता व्यवस्थापन गर्न केन्द्रीय बैंकका रूपमा नेपाल राष्ट्र बैंकले एक खर्ब रुपैयाँ बराबरको निक्षेप संकलनका लागि बोलकबोल आह्वान गरेको छ।
राष्ट्र बैंकले बुधबार एक सार्वजनिक सूचना जारी गर्दै वित्तीय बजारबाट उक्त परिमाणको रकम प्रशोचन गर्न लागेको जानकारी दिएको हो।
केन्द्रीय बैंकको सूचनाअनुसार यस बोलकबोल प्रक्रियामा नेपाल राष्ट्र बैंकबाट इजाजतपत्र प्राप्त ‘क’ वर्गका वाणिज्य बैंक, ‘ख’ वर्गका विकास बैंक र ‘ग’ वर्गका वित्त कम्पनी (फाइनान्स कम्पनी) हरू मात्र सहभागी हुन पाउनेछन्।
बोलकबोलमा सहभागी हुन चाहने बैंक तथा वित्तीय संस्थाहरूले आफूले निक्षेप राख्न चाहेको कुल रकम र त्यसबापत दाबी गर्ने प्रस्तावित ब्याजदर (दशमलवपछिको चार अंकसम्म खुलाएर) स्पष्ट रूपमा उल्लेख गर्नुपर्ने कानुनी व्यवस्था गरिएको छ।
यस निक्षेप संकन उपकरण अन्तर्गत इच्छुक संस्थाहरूले घटीमा १० करोड रुपैयाँ र बढीमा ५ करोड रुपैयाँले भाग गर्दा निःशेष भाग जाने गरी कुल आह्वान गरिएको एक खर्ब रुपैयाँको सीमाभित्र रहेर बोलकबोल आवेदन दिन सक्नेछन्।
बजारमा पैसाको उपलब्धता बढी भई ब्याजदर सस्तो हुन नदिन राष्ट्र बैंकले निश्चित अवधिका लागि बैंकहरूबाट यसरी पैसा तान्ने गर्दछ, जसलाई वित्तीय भाषामा मौद्रिक नीति कार्यान्वयनको अल्पकालीन उपकरण मानिन्छ।
