काठमाडौं । कर सहभागिता बढाउन र वास्तविक बिल लिने बानीको विकास गराउन आन्तरिक राजस्व विभागले करदाता प्रोत्साहन उपहार कार्यक्रम सञ्चालनमा ल्याएको छ ।
विभागले यसका लागि गत साउन १ गतेदेखि १०० रुपैयाँभन्दा बढीको नगद भुक्तानी गरी सामान किनेको बिल दर्ता गराउन आह्वान पनि गरेको छ । विभागले यसका लागि छुट्टै नयाँ वेब पोर्टल पनि सञ्चालनमा ल्याएको छ ।
साउन १ गतेयता नेपालभित्र स्वप्रयोजनका लागि १०० रुपैयाभन्दा बढीको सामान वा सेवा खरीद गरी सक्कली प्यान तथा भ्याट बिल वेब पोर्टलमा दर्ता तथा अपलोड गर्न पनि विभागले आग्रह गरेको छ ।
डिजिटल भुक्तानी (क्यूआर) बाट सामान वा सेवा खरीद गरेका उपभोक्ताले भने वेबसाइटमा छुट्टै बिल दर्ता गर्नु नपर्ने र त्यस्तो कारोबार स्वतः प्रणालीमा आवद्ध हुने विभागले जनाएको छ । क्यूआरबाट भुक्तानी गरेपछि कारोबार भने डाउनलोड गरेर राख्नुपर्नेछ भने सोही ट्रान्ज्याक्सन नम्बर नै उपहारका लागि प्रविष्ट हुनेछ ।
उपहार घोषणा भएपछि पुरस्कार प्राप्त गर्न सक्कली बिल अनिवार्य पेश गर्नु पर्नेछ । साथै सामान खरीद गर्दा सक्कली भ्याट वा बिल माग गर्न र बिक्रेताले बिल नदिएमा विभागमा जानकारी गराउन पनि आग्रह गरेको छ ।
विभागले पहिलो १५ दिन (साउन १५ गतेसम्मको) नतिजा आगामी साता सार्वजकिन गर्नेछ । उपहारमा हरेक दिन एकजना भाग्यशालीलाई नियमानुसार लाग्ने कर कट्टी गरी १ लाख नगद र हरेक १५–१५ दिनमा अर्थात महीनामा २ जनालाई एकमुष्ट १० लाख रुपैयाँ दिइनेछ ।
चालू आर्थिक वर्षको बजेटमा अर्थमन्त्री डा. स्वर्णिम वाग्लेले करदातालाई कर प्रणालीमा जोड्न र नियमित बिल लेनदेनको बानी विकास गराउन करदाता प्रोत्साहन उपहार कार्यक्रम सञ्चालनमा ल्याउने घोषणा गरेका थिए । त्यसै घोषणा अनुरूप यो कार्यक्रम सञ्चालनमा ल्याइएको हो ।
