एजेन्सी – अमेरिकामा मध्यावधि निर्वाचन नजिकिँदै गर्दा राष्ट्रपति डोनाल्ड ट्रम्प प्रशासनले इन्धन र मलको मूल्यवृद्धिबाट प्रभावित किसानलाई राहत दिन १५ अर्ब डलरभन्दा बढीको सहयोग प्याकेज घोषणा गरेको छ ।
अमेरिकी कृषि मन्त्रालयका अनुसार डिजेलको बढ्दो खर्च व्यहोरेका किसानलाई आठ अर्ब डलर एकपटकका लागि भुक्तानी गरिनेछ । त्यस्तै, पशुपालक तथा माछापालकका लागि पाँच अर्ब डलर बराबरको ऋण प्रत्याभूति उपलब्ध गराइनेछ ।
मल उत्पादन, मासु प्रशोधन तथा विशेष बालीसम्बन्धी परियोजनाका लागि पनि सरकारले रकम छुट्याएको छ । यसअघि सन् २०२५ को बाली वर्षका लागि योग्य किसानलाई १३ अर्ब ८० करोड डलर भुक्तानी गर्ने योजना सार्वजनिक गरिएको थियो ।
तर कृषि व्यवस्थापन विशेषज्ञ ग्रेग इबेन्डहलले सरकारी सहयोगले किसानलाई तत्काल राहत दिए पनि उत्पादन लागत बढ्नुका दीर्घकालीन समस्या समाधान नगर्ने टिप्पणी गरेका छन् ।
मल र इन्धनको मूल्यवृद्धिसँगै चीनसँगको व्यापार तनावका कारण अमेरिकी किसानको आम्दानी प्रभावित भएको छ । अमेरिकन अटोमोबाइल एसोसिएसन (एएए) का अनुसार डिजेलको औसत मूल्य प्रतिग्यालन ६.३२ डलर पुगेको छ, जुन एक वर्षअघिको तुलनामा ७० प्रतिशत बढी हो ।
किसान र ग्रामीण क्षेत्रका मतदाता ट्रम्पका महत्त्वपूर्ण समर्थक मानिए पनि उनका केही नीतिप्रति असन्तुष्टि बढिरहेको विश्लेषकहरूको भनाइ छ । राहत घोषणाका बाबजुद जीवनयापन खर्च र स्वास्थ्य सेवाको विषय मतदाताका लागि महत्त्वपूर्ण बनेको छ ।
मध्यावधि निर्वाचनको दुई दिनअघि ट्रम्पले किसान तथा ग्रामीण मतदातालाई लक्षित गर्दै आयोवा र कन्सासको भ्रमणसमेत गरेका छन् ।
