काठमाडौँ । नेपाल विद्युत प्राधिकरणले पुस महिनामा मात्रै १९ हजार बढी ग्राहकको बिजुली काटेको छ । समयमै बक्यौता नबुझाउने १९ हजार २३२ ग्राहकको बिजुली काटिएको प्राधिकरणले जनाएको छ ।
जसमध्ये १४ हजार १११ जनाले बक्यौता बुझाएपछि लाइन जोडिएको छ । जसबाट २२ करोड ८४ लाख बक्यौता महशुल उठेको प्राधिकरणको अर्थ महाशाखाले जनाएको छ ।
तथ्यांकअनुसार सबैभन्दा बढी मधेश प्रादेशिक कार्यालयले ६ हजार ३६८ ग्राहकको बिजुली काटेको थियो । जसमध्ये तीन हजार ८६७ जनाले ८ करोड २५ लाख ९५ हजार रुपैयाँ बक्यौता तिरेका छन् ।
त्यसपछि कोशी प्रादेशिक कार्यालयले तीन हजार २९१ ग्राहकको बिजुली काटिएकोमा दुई हजार ८४२ ग्राहकले ३ करोड २० लाख ८१ हजार रुपैयाँ बक्यौता बुझाएर पुन:लाइन जोडेका छन् । यस्तै लुम्बिनी प्रादेशिक कार्यालयले दुई हजार ४४० ग्राहकको बिजुली काटेको थियो । जसमध्ये दुई हजार १५१ ग्राहकले बक्यौता बुझाएका छन् ।
सबैभन्दा कम बागमती प्रदेश प्रदेश डिभिजन कार्यालयले ७०४ ग्राहकको बिजुली काटेकोमा ४६७ जनाले पुन: बिजुली जडान गरेका छन् ।
बक्यौता तिर्ने ग्राहकको घरमा पुन:लाइन जडान गरिएको छ । बाँकी पाँच हजार १२१ ग्राहकले अझैँ बक्यौता तिरेका छैनन् ।
