काठमाडौं । कुनै दिन निर्जीवन बीमा क्षेत्रको सबैभन्दा ठूलो व्यवसाय मानिएको मोटर पोर्टफोलियोको हिस्सा ह्वात्तै घटेको छ । निर्जीवन व्यवसायमा विगतमा मोटरको हिस्सा ३५ प्रतिशत माथि रहन्थ्यो । तर, चालु आर्थिक वर्षको साउनमा भने मोटरको हिस्सा २२.६४ प्रतिशतमा सीमित भएको छ ।
चालु आर्थिक वर्षको साउनमा मोटर बीमा मार्फत १ अर्ब २२ करोड २९ लाख रुपैयाँ बीमा शुल्क उठेको छ । जुन निर्जीवनबाट संकलन भएको कुल बीमा शुल्कको २२.६४ प्रतिशत हुन जान्छ ।
त्यसैगरी, सम्पत्ति बीमामा मानिसहरू आकर्षण हुँदै गएका छन् । बीमाकाे जनचेतना फैलँदै गएपछि सम्पत्तिको बीमा गर्नेहरू पनि बढेका हुन् । सम्पत्तिको बीमा अन्तर्गत साउनमा १ अर्ब ६५ करोड ७५ लाख रुपैयाँ संकलन भएको छ । जुन कुल व्यवसायको ३०.६९ प्रतिशत हो ।
त्यसैगरी, इन्जिनियरिङ तथा हेक्काको बीमा मार्फत ७५ करोड ८७ लाख रुपैयाँ संकलन भएको छ । जुन १४ प्रतिशत हिस्सा हो । सामुद्रिक बीमाको हिस्सा ८ प्रतिशत रहेको छ । सामुद्रिक बीमा मार्फत साउनमा ४२ करोड ९१ लाख रुपैयाँ संकलन भएको छ । स्वास्थ्य बीमाको हिस्सा ६ प्रतिशत, कृषि तथा बालीको ३.५६, हवाई बीमाको २.४९ र लघु बीमाको हिस्सा १.३६ प्रतिशत रहेको छ ।
